From: Ashish Bokil Path: hubcap!abokil Date: 16 Feb 95 04:21:36 GMT Message-ID: Newsgroups: rec.music.indian.misc Subject: Magic Moments - R D Burman - Gulzar - XII Keywords: RDB RD Gulzar Asha samay ki guzarti hui bailgaadi kal lamhon ki kuchh aur dhool udaa kar chali gayi... uDate hue lamhe shaant ho kar phir baith gaye ... aur saa.Nso.N ki aawaaz sannate ko todne lagi ... is aawaaz se door bhaangaa mumkin na thhaa .. shaayad sannate ko khatm karne se thhodi raahat mile ... aksar kuchh qhayal is be-sabri ke maahaul se door le jaane ke liye chale aate thhe ... qhayaal... jinme sukoon thhaa, jinme beqaraari thhee ... qhwaab-gaah thhee, ... jinme bezaaree thhee ya phir ..... teekhe khanjar ki tarah dil main utar jaane waali chubhan hi thhee .......lekin qhayaalo.N ki pudiyaa bhee aaj ... khaali ho gayi thhee .... kaii.N baar sunaa thha ki ye lamhe bade jaadugar hote hain ... jab hawaa main Uthhate hain to saath main ek kahaani lekar... aur baithhate hain to koi aur hi afsaanaa lekar ..... har raah chalne waalaa unmein se kuchh kahaaniyaan paDh letaa hai aur apne andaaz main kuchh aur kahaaniyan likh jaataa hai ... sochaa ... kisi lamhe ko pakad kar usi ki kahaani paDh loon .... haath baDhaa kar ek bhaagte hue lamhe ko kaabu main kiyaa lekin jaise hi muththhee khuli ... woh lamhaa bejaan hokar zameen pe gir padaa ..... pataa nahee kyon bhaag rahaa thhaa wo lamhaa ... shaayad apne khokhale pan se door? .... shaayad main use pakaDtaa nahee to koi aur musaafir uskaa khaali daaman kisi khoobsoorat kisse se bhar detaa aur use zindagi mil jaati ..... magar kal mere hisse main aaye har lamhe kaa yahee anjaam thhaa ... kabhee lamhon ki jhaalar pe kaseede huaa karte thhey .. magar kal shaam wo jhaalar bilkul kori thhee ... be-noor aur be-rang ... be-khayaali ke is aalam main bhee kuchh khayaal aaye magar zehan ki chaukhat band dekh kar laut gaye .. saans rok kar sehame se baithhey hue, unse aur apne aap-se door bhaagte hue hum ...andar na chiraag thhaa na koi aahat ... shaayad wo jaan gaye thhey ki darwaazaa kholne ke liye andar koi nahee hai ... oopar hi oopar to chehare se berookhi tapak rahi thhee lekin kaheen andar ... man hi man ye chaah thhee ki ye khayaal thhodi der to intezaar kar le.N .....kambakht do pal bhee ruk na sake ... bahut ummeed lagaayi thhee in khayaalon se ...unke laut jaane ki maayoosii jo thhee ..... phir tanhaai ke paas aa baithhey ... tanhaai kaa badaa sahaaraa hai ... is kadar pyaar se apne aagosh main chhupaa leti hai ki nikalne ki tabiyat nahee karti .... pareshaani tab hoti hai jab tanhaai ke paas baithhaa dekh kar.. wo khayaal jinse se door bhaagnaa chaahtaa thhaa ... kambakht phir chale aate hain .... tanhaai ke saaz par ... khaayaalon ke saazinde ... khaamoshi ki sargam sunaate chale gaye ...... bebas aur maayoos ... hum apni majbooriyon ki sharmindagi ko chhupaane ki koshishon ko naakaam hotaa dekhte rahe ...... lehar ki tarah magar sargoshi se uthhate hue toofaan ki aahat bhee na mili ki har taraf behisaab pecheeda khayaalon ki gehraaiyon main khud ko doobtaa utartaa paane lage .... wo tamaam bichhade hue manzar, chhode hue khwaab aur dabaayi hui hasrate.N ek saath aanhon ke saamne se guzarne lage ... jazbaaton kaa sailaab umad padaa thhaa .... chhoti si shabnam bhalaa kab taq iskaa saamnaa karti ...? aahistaa aahistaa .. aankhon ki pagdandi se hote hue palkon kaa dahaktaa jungle paar karte-karte shabnam ke do tukde chilmano.n ke darwaaze taq pahunche magar dhulakne se pehale hi sookh gaye ... toofaan jeet gayaa ...... sailaab bhee guzar gayaa .... tanhaai ne saath chhod diyaa ... aur peechhe reh gayi ... ....... ek khaali shaam ..... khaali haath shaam aayi hai ... ho s s s khaali haath shaam aayi hai ... khaali haath jaayegi ... aaj bhee na aayaa koi ... aaj bhee na aayaa koi ... khaali laut jaayegi ... khaali haath shaam aayi hai ... khaali haath jaayegi ... khaali haath shaam aayi hai ... this song from ijaazat is simple, yet poignant in its meaning. Devoid of bombastic metaphors, it just makes its mark on the listener by its directness. the music is apt too. The soft flute sails through the interludes, knitting them with the stanzas and never letting the continuity break. The guitar strums interspersed through the flute interludes enhance the feeling of "khaalipan" that the song is all about. the second interlude starts with sitar taken over by a small piece on santoor and concluded again with the flute which echoes the emptyness by its low and soft sound almost melting into asha's tender voice ..... trust RD to come up with such nuances that make the song breath the emotions that gulzar's lyrics emit ..... esp when they had lata [of yesteryears], asha or kishore to sing them ....... aaj bhee na aaye aansoo ... aaj bhee na bheege nainaa ... aaj bhee na aaye aansoo ... aaj bhee na bheege nainaa ... aaj bhee hai kori rainaa ... aaj bhee hai kori rainaa ... kori laut jaayegi ... khaali haath shaam aayi hai ... khaali haath jaayegi ... khaali haath shaam aayi hai ... raat ki siyaahi koi ... aaye to mitaaye naa ... raat ki siyaahi koi ... aaye to mitaaye naa ... aaj naa mitaayi to ... aaj naa mitaayi to ... kal bhee laut aayegi ... khaali haath shaam aayi hai ... khaali haath jaayegi ... aaj bhee naa aayaa koi ... aaj bhee naa aayaa koi ... khaali laut jaayegi ... khaali haath shaam aayi hai .. khaali haath jaayegi ... khaali haath shaam aayi hai ... flute follows the tune and fades out ... guitar strums accompany it into silence .... ashish :::::::::::::::::::::::::::..................:::::::::::::::::::::::::::::::::: Hum tum naa hum tum rahen ab ... kuchh aur hi ho gaye ab ... ^ ^ (0 0) Ashish S Bokil --ooO I Ooo-- Tel.# (512) 467-8735 (Res) 4559 Avenue A, # 201 \ / ashish@ccwf.cc.utexas.edu Austin TX 78751 - - ```````````````````````````"""""""""""""""""""'''''''''''''''''''''''''''''''''