Path: msunews!news.gmi.edu!usenet.eel.ufl.edu!newsfeed.internetmci.com!swrinde!cs.utexas.edu!geraldo.cc.utexas.edu!sneezy.cc.utexas.edu!ashish From: Ashish Bokil Newsgroups: rec.music.indian.misc Subject: Magic Moments - R D Burman - Gulzar - XV Date: Tue, 21 Nov 1995 19:56:28 -0600 Organization: The University of Texas at Austin, Austin, Texas Lines: 123 Message-ID: NNTP-Posting-Host: sneezy.cc.utexas.edu Mime-Version: 1.0 Content-Type: TEXT/PLAIN; charset=US-ASCII ... kabhee jaanaa huaa saa rukh jaan kar anjaan ban jaataa hai to us anjaanepan ko anjaanaa karne ki koshish mein insaan jaane-anjaane hi jaane lamhon se takraa jaataa hai ... aur phir ek zanjeer ki tarah juDe tamaam un lamhon se rub-roo ho jaataa hai jinse anjaann hote hote woh apne aapse hi anjaan ho chalaa thhaa ... aaj in lamhon se pare hone kaa koi zariyaa kaafi nahee thhaa ... bekhudi unhen door naa kar saki ... jo aaspaas bikhraa thhaa woh nazaron ki daraaren nahee puraane jazbaaton ke tukde thhey ... poori raat thhee un tukDon ko sametne ke liye ... bahut lambi raat thhee ... us jhoothhey sahar ke saathh khatm nahee hui jo sooraj ke saath chali aayi thee .. ... caro.n ke jungle ke beech kitaabon kaa bojh kaandhon pe liye hue, kadmon ko ghaseetanaa shuru kiyaa hi thhaa ki saamne pichhale kisi janam mein saath chale saaye kaa chehraa nazar aayaa ... door kaheen shor machaate parinde chupchaap ho gaye ... kadamon ke neeche patto.n kaa charcharaanaa thham gayaa ... geeli si hawaa ke sard jho.ko.n ke paine-pan se thharathharaati peD ki shaakh shaant ho gayi ... magar ye kadam bekhabar beroktok uthhate rahe ...unpe koi zor nahee chaltaa thhaa ... saayaa kareeb aataa rahaa ... geharaayi hui kamzor aankhe usme pehachaan dhhoondhati rahi .... jaani si shakl mein anjaanaapan thhaa ... nigaahon mein umr bhar ke jo faasle thhey ... us ek chhote se lamhe mein kahaan tay ho paate? ... lafzon tak haalaat nahee pahunche ... nigaahon ke is shor mein lafz khaamosh reh gaye ....darmiyaani bezubaani mein haathon kaa uthhanaa be-asar thaa ... phir ek baar wohi lamhaa .. phir ek baar wohi raat ... kab tak? ... kab tak? .... ... baDhhate kadam bhee un lamhon ko thhaharne se rok naa sake ... main un lamhon mein akelaa hi sahee, un-se bekhabar na thhaa us saaye ki terah ... unmein kaiin baar nazaaraa kiyaa thhaa ... usee baDhate haathh kaa jo kal phir baDhhaa thhaa ... ruk - ruk kar ... baDhanaa chaahte nahee thhey ... jaise majboori mein baDhh gaye hon ... raat bahut lambi thhee ... chalaa thhaa kaam mein apne aap ko dubone ... par manzil se kuchh door thhehraa aur laut aayaa ... ..... bekhudi ke safar mein un lamhon ke saath ek aur raat ... raat phir raat hai .... gehri aur thhehri si .. bezubaan aur dari si ... iske koi jazbaat nahee hain ... naa kisi kone mein halchal hai ... kaalikh kaa dhher, ... ye raat khaamosh andheron kaa khel hai .. yaa ye sirf meraa vaham hai ... naa raat bezubaan hai ... naa andhere khaamosh hain ... sile labon se keh jaate hain woh har baat jo mein ghhuti subah mein nahee keh paayaa ... apne aap ko samjhaa nahee paayaa ... mujhse kaheen zyaadaa zindaa hai ye raat ... jo apni khaamoshi mein meri aawaaz se behtar aur bekhauf keh jaati hai har woh baat ... jo mein dafan kar aayaa thhaa ... apni bekhudhi mein apne aap ke saath ... baDi bedard hai ye raat jo meri bekhudi main bhee mujhe khud se robaroo ... karaa jaati hai ... har ek aahat mein, har ek lamhe ke saath ... haan ... ye vaham hi hai ki ... chupchaap hai ye raat ... Magar Gulzar saahab kaa Burmanda aur Asha Bhosle ke saath "Dil Padosi hai" mein ye kehnaa hai ki ... raat chupchaap dabey paaon chali jaati hai ... ] X 2 ] raat khaamosh hai ... roti bhee nahee hansti bhe nahee ...] X 2 as Asha picks up what starts with waves taken over by deep flute resonated with base guitar delicately touched by flute again ... Asha merges into violins that leave a trail ... to be taken over by music box... picked up again by gushing violins ... as Asha continues .... kaanch kaa neelaa-saa gumbad hai uDaa jaataa hai ... ] X 2 khaali khuli koi gajraa saa bahaa jaataa hai .. ek sailaab hai .... saahil pe bichhaa jaataa hai ... raat chupchaap dabey paaon chali jaati hai ... flute .. guitar .. flute again ... the soft deep flute smoothly wiggling its way through emotions .. Asha's voice mingles homogenously with the atmosphere created by music ... chaand ki kiranon mein wo roz saa resham bhee nahee ... ] X 2 chaand ki chikani Dali hai ke ghuli jaati hai ... aur sannaaton ki .... ik dhool udi jaati hai ... raat chupchaap dabey paaon chali jaati hai ... another beautiful interlude with flute and violins ... kaash ik baar kabhee neend see uthhkar tum bhee ...]x2 ... music stops hizra ki raaton mein .... ye dekho to kyaa hotaa hai ... ... waves die down ..... kab tak ye raat kaa daaman saathh saathh chalegaa? ... kab tak ye kaalikh kalam mein thhaame kaaghaz ke purzon ko raakh mein badalate dekhte rahenge? ... dil kaa khwaab thhaa yaa raaton ke saaye kaa nayaa pehaloo ... jaane kab maaloom hogaa ... baDhate kadmon mein kisi ne pahaaD si beDiyaan daal di thhee yaa nazron ke samne chingaariyon kaa toofaan thaa ... ek ek kadam uthhaanaa bhaari thhaa ... aankhon ne jalti hui koi tasveer chhoo li thhee .. yaa labon pe pathThhar ka vazan hi thhaa .. ek ek lamhon mein kaiin kaiin zindagiyaan guzaar chale thhey ... bas zindagiyon mein jaan nahee thhee ... aur phir kyaa kaam thhaa isme jaan kaa ? ... sisakti saason mein jaan ho yaa naa ho ... koi fark nahee paDtaa na? khalish baDhati hi hai .. kam nahee hoti .. ashish :::::::::::::::::::::::::::..................:::::::::::::::::::::::::::::::::: hum hi naadaa.N they jo oDhaa beeti yaadon kaa kafan ... varnaa jeene ke liye sab kuchh bhulaa lete hain log ... ^ ^ (0 0) Ashish S Bokil --ooO I Ooo-- Tel.# (512) 467-8735 (Res) 4559 Avenue A, # 201 \ / ashish@ccwf.cc.utexas.edu Austin TX 78751 - - ```````````````````````````"""""""""""""""""""'''''''''''''''''''''''''''''''''