lagataa nahii.n hai jii meraa uja.De dayaar me.n
kis kii banii hai aalam-e-naa-paayedaar me.n

bulabul ko baaGabaa.n se na saiyyaad se gilaa
qismat me.n qaid thii likhii fasal-e-bahaar me.n

umr-e-daraaz maa.Ng ke laaye the chaar din
do aarazU me.n kaT gaye, do i.ntazaar me.n

kah do in hasarato.n se kahii.n aur jaa base.n
itanii jagah kahaa.N hai dil-e-daaGadaar me.n

hai kitana badanasiib zafar dafn ke liye
do gaz zamiin bhii na milii kU-e-yaar me.n