raakhii dhaago.n kaa tyauhaar -2
ba.Ndhaa hu_aa ik-ik dhaage me.n bhaa_ii-bahan kaa pyaar
raakhii dhaago.n kaa ...

kitanaa komal kitanaa sundar bhaa_ii-bahan kaa naataa
is naate ko yaad dilaane ye tyauhaar hai aataa
bahan ke man kii aashaa_e.N raakhii ke ye taar
raakhii dhaago.n kaa ...

bahan kahe mere viir tujhe naa burii najariyaa laage
mere raajaa bhaiyyaa tujhako merii umariyaa laage
dhan huu.N paraayaa phir bhii miluu.Ngii saal me.n to ik baar
raakhii dhaago.n kaa ...

bhaa_ii kahe o bahan mai.n terii laaj kaa huu.N rakhavaalaa
guu.Nthuu.Ngaa mai.n pyaar se tere aramaano.n kii maalaa
bhaa_ii-bahan kaa pyaar rahegaa jab tak hai sa.nsaar
raakhii dhaago.n kaa ...