kyaa miliye aise logo.n se, jinakii fitarat chhupii rahe
nakalii cheharaa saamane aae, asalii suurat chhupii rahe

khud se hii jo khud ko chhupaae, kyaa unase pahachaan kare.n
kyaa unake daaman se lipaTe.n, kyaa unakaa aramaan kare.n
jinakii aadhii niiyat ubhare, aadhii niiyat chhupii rahe,
nakalii ...

diladaarii kaa Dho.ng rachaakar, jaal bichhaae baato.n kaa
jiite jii kaa rishtaa kahakar, sukh Dhuu.NDhe kuchh raato.n kaa
ruuh kii hasarat lab pe aae, jism kii hasarat chhupii rahe,
nakalii ...