tumhe.n baaGo.n me.n saavan me.n nazaare yaad karate hai.n
chale aa_o tumhe.n aa.Nsuu hamaare yaad karate hai.n

bahaare.n puuchhatii hai.n merii aa.Nkho.n se pataa teraa
chaman me.n phuul tujhako pyaare-pyaare yaad karate hai.n

papiihe pii-pii kah ke giit aksar bhuul jaate hai.n
tumhe.n ro-ro ke jab ham Gam ke maare yaad karate hai.n

vahii nazare.n jinhe.n tumane kabhii ulfat sikhaa_ii thii
unhii.n maasuum nazaro.n ke ishaare yaad karate hai.n