nikale the kahaa.N jaane ke liye, pahu.nche hai kahaa.N maalUm nahii.n 
ab apane bhaTakate qadamo.n ko, ma.njil kA nishaan maalUm nahii.n 

hamane bhI kabhI is gulshan me.n, ek khvaab-e-bahaara dekhaa thaa 
kab phuul jhare, kab gard u.Dii, kab aa_ii khizaa.n maalUm nahii.n 

dil sholaa-e-Gam se khaak huA, yA aag lagI aramAno.n me.n 
kyA chiiz jalii kyuu.n siine se uThaa hai dhuaa.n maalUm nahii.n 

barabaad vafaa kA afasaanaa ham kise kahe.n aur kaise kahe.n 
khaamosh hai.n lab aur duniyA ko ashko.n kI zubaa.n maalUm nahii.n