raate.n guzaar dii hai.n taaro.n kii roshanii me.n
afasaane sun chukaa huu.N apanii hii Kaamoshii me.n

larazish sii ho rahii hai aalam kii kul-fizaa me.n
rotaa hai ko_ii bekas shaayad ke bekasii me.n

mai.n mahav-e-bandagii huu.N wo maayal-e-taGaaful
kuchh lutf aa rahaa hai is tarz-e-dilabarii me.n

ukataa gayaa hai aalam afasaanaa sunate-sunate
aa.Nkhe.n jhapak rahe hai.n taare bhii Kaamoshii me.n