kaaravaa.N guzaraa kiyaa ham rahaguzar dekhaa kiye
har qadam par naqsh-e-paa-e-raahabar dekhaa kiye

yaas jab chhaa_ii ummide.n haath mal kar rah ga_ii.n
dil kii nabze.n chhuT ga_ii.n aur chaaraagar dekhaa kiye

ruK merii jaanib nigaah-e-lutf dushman kii taraf
yuu.N udhar dekhaa kiye goyaa idhar dekhaa kiye

dardama.ndaan-e-wafaa kii haay re majabuuriyaa.N
dard-e-dil dekhaa naa jaataa thaa magar dekhaa kiye

tuu kahaa.N thii ai ajal ai naa_muraado.n kii muraad
marane waale raah terii umr bhar dekhaa kiye

% ajal: maut, death, qismat