ab ke tajadiid-e-wafaa kaa nahii.n imkaa.N jaanaa.N
yaad kyaa tujhako dilaaye.n teraa paimaa.N jaanaa.N

zi.ndagii terii ataa thii so tere naam kii hai
hamane jaise bhii basar kii teraa ahasaa.N jaanaa.N

ab walawwal kii mohabbat ke nashe yaad to kar
be piye bhii teraa cheharaa thaa gulistaa.N jaanaa.N

muddato.n se yahii aalam na tawaqqo na ummiid
dil pukaare hii chalaa jaataa hai jaanaa.N jaanaa.N

ham ke ruuThii hu_ii rut ko bhii manaa lete the
hamane dekhaa hii na thaa mausam-e-hijraa.N jaanaa.N

yuu.Nhii mausam kii adaa dekh ke yaad aayaa hai
kis kadar jald badal jaate hai.n insaa.N jaanaa.N