chalo tumane kisii ke saath ye ulfat nibhaa_ii to
meraa dil to.D kar tumane na_ii duniyaa basaa_ii to

mujhe itanaa bataa_o kyaa tumhaaraa dil nahii.n ta.Dapaa
merii tasaviir apanii mez se tumane haTaa_ii to

nayaa mausam hazaaro.n ra.ng Kushiyo.n ke bikheregaa
karoge kyaa agar aise me.n merii yaad aa_ii to

ye maanaa apane chehare par sajaayaa hai nayaa cheharaa
kisii suurat magar tumane mujhe suurat dikhaa_ii to