dayaar-e-dil kii raat me.n charaaG saa jalaa gayaa
milaa nahii.n to kyaa hu_aa wo shaql to dikhaa gayaa

wo dostii to Kair ab nasiib-e-dushmanaa.N hu_ii
wo chhoTii chhotii ra.njisho.n kaa lutf bhii chalaa gayaa

judaa_iyo.n ke zaKm dard-e-zi.ndagii ne bhar diye
tujhe bhii nii.nd aa ga_ii mujhe bhii sabr aa gayaa

pukaaratii hai.n fursate.n kahaa.N ga_ii.n wo sohabate.n
zamii.n nigal ga_ii unhe.n yaa aasamaan khaa gayaa

ye subaho kii safediyaa.N ye dopahar kii zardiyaa.N
ab aa_iine me.n dekhataa huu.N mai.n kahaa.N chalaa gayaa

ye kis Kushii kii ret par Gamo.n ko nii.nd aa ga_ii
wo lahar kis taraf ga_ii ye mai.n kahaa.N chalaa gayaa

ga_e dino.n kii laash par pa.De rahoge kab talak
alamkasho uTho ki aafataab sar pe aa gayaa

% all shers were not in the version I heard