ek pagalii meraa naam jo le sharamaaye bhii ghabaraaye bhii
galiyo.n galiyo.n mujhase milane aaye bhii ghabaraaye bhii

raat gaye ghar jaane waalii gumasum la.Dakii raaho.n me.n
apanii ulajhii zulfo.n ko sulajhaaye bhii ghabaraaye bhii

kaun bichha.D kar phir lauTegaa kyuu.N aawaaraa phirate ho
raato.n ko ek chaa.Nd mujhe samajhaaye bhii ghabaraaye bhii

aane waalii rut kaa kitanaa Kauf hai usakii aa.Nkho.n me.n
jaane waalaa duur se haath hilaaye bhii ghabaraaye bhii