piine pilaane ke sab hai.n bahaane
kahaa.N kii mohabbat kahaa.N ke fasaane

Kushii me.n bhii pii hai to Gam me.n bhii pii hai
hai.n mastii bhare ye may ke paimaane

kisii ne mujhe mast nazaro.n se dekhaa
qadam Kud-ba-Kud ab lage la.Dakha.Daane

sataaye na hamako kabhii yaad-e-maazii
chalo bhuul jaaye.n wo guzare zamaane

chalo ab to 'gumanaam' is mayakade se
tumhe.n dafn karane hai.n sab Gam puraane