rah-e-ishq kii intehaa.N chaahataa huu.N
junuu.N saa ko_ii rahanumaa chaahataa huu.N

jo irafaan kii zi.ndagii ko ba.Dhaa de
mai.n wo waadaa-e-jaa.N-fizaa chaahataa huu.N

miTaa kar mujhe aap me.n jazb kar le
baqaa ke liye mai.n fanaa chaahataa huu.N

bayaa.N haal-e-dil mai.n karuu.N kyuu.N zabaa.N se
Kudaa jaanataa hai mai.n kyaa chaahataa huu.N

mere chaaraagar mai.n huu.N biimaar teraa
tere haath se hii shifaa chaahataa huu.N