shauq se naakaamii kii badaulat kuuchaa-e-dil hii chhuuT gayaa
saarii ummiide.n TuuT ga_ii.n, dil baiTh gayaa, jii chhuuT gayaa

liijiye kyaa daaman kii Kabar aur dast-e-junuu.N ko kyaa kahiye
apane hii haath se dil kaa daaman muddat guzarii chhuuT gayaa

ma.nzil-e-ishq pe tanhaa pahu.Nche ko_ii tamannaa saath na thii
thak thak kar is raah me.n aaKir ek ik saathii chhuuT gayaa

'faanii' ham to jiite jii wo mayyat hai.n be-gor-o-qafan
Gurbat jisako raas na aa_ii aur watan bhii chhuuT gayaa