tumhaare Kat me.n nayaa ik salaam kisakaa thaa
na thaa raqiib to aaKir wo naam kisakaa thaa

rahaa na dil me.n wo bedard aur dard rahaa
muqiim kaun hu_aa hai maqaam kisakaa thaa

 mukiim: maalik, resident, basane waalaa

wafaa kare.nge, nibaahe.nge, baat maane.nge
tumhe.n bhii yaad hai kuchh ye kalaam kisakaa thaa

guzar gayaa wo zamaanaa kahuu.N to kisase kahuu.N
Kayaal dil ko mere subah-o-shaam kisakaa thaa

 the following sher are not in the version I heard

wo qatl karake mujhe har kisii se puuchhate hai.n
ye kaam kisane kiyaa hai ye kaam kisakaa thaa

inhii.n safaat se hotaa hai aadamii mashahuur
jo lutf aap wo karate to naam kisakaa thaa

na puuchh gachchh kisii kii wahaa.N na aaw-bhagat
tumhaarii bazm me.n kal ehataraam kisakaa thaa

hamaare Kat ke to purje kiye pa.Dhaa bhii nahii.n
sunaa jo tumane ba-dil wo payaam kisakaa thaa

har ek se kahate hai.n kyaa 'daaG' bewafaa nikalaa
ye puuchhe inase ko_ii wo Gulaam kisakaa thaa