waqt-e-piirii shabaab kii baate.n
aisii hai.n jaise Kwaab kii baate.n
phir mujhe le chalaa udhar dekho
dil-e-Kaanaa-kharaab kii baate.n
mahajabii.n yaad hai ki bhuul gaye
wo shab-e-maahataab kii baate.n
tujhako rusawaa kare.ngii Kuun-e-dil
terii ye iztiraab kii baate.n
sunate hai.n unako chhe.D chhe.D ke ham
usake mu.Nh se itaab kii baate.n
zikr thaa josh-e-ishq me.n ai 'zauq'
ham se ho.n sabr-o-taab kii baate.n
|