yaad karataa hai mujhe aaj bhii ronevaalaa
ajanabii ho na sakaa ajanabii honevaalaa

haal mat puuchh tabaahii kaa merii tuufaa.N se
mere nazadiik hii baiThaa hai Dubonevaalaa

Dhuu.N.Dhataa rahataa hai kaaGaz pe miTii taqadiire.n
Kat mujhe likhake mere Kat ko bhigonevaalaa

bas yahii sochake tuufaa.N se ubhar aataa huu.N
Duub jaa_e na kahii.n mujhako Dubonevaalaa

jahaa.N jazabaat bhii chiizo.n kii tarah bikate ho.n
aisii duniyaa me.n tujhe kaun hai ronevaalaa

puuchhataa rahataa hai kyaa kuchh merii tanahaa_ii se
vaqt-e-ruKsat mere kaa.Ndhe ko bhigonevaalaa

baad marane ke sabhii usake hu_e baiThe hai.n
ye vo 'a.njum' hai kisiikaa bhii na honevaalaa