(jazb-e-vafaa se kaam liyaa aur pii ga_e
saaqii se ba.Dhake jaam liyaa aur pii ga_e
maaluum jab hu_aa ke mainaab hai haraam
allaa miyaa.N kaa naam liyaa aur pii ga_e)

saaqii terii mahafil me.n ham jaam uchhaale.nge
jab kaabe me.n jaa_e.Nge zamazam se nahaa le.nge

duniyaa ke har-ek Gam se behatar hai Gam-e-jaanaa
sau shamme.n bujhaakar ham ek shammaa jalaa le.nge

ai pardaanashii.n tumako ye pardaa mubaarak ho
ham apane tasavvur me.n tasviir banaa le.nge

jaane do zaraa kashtii machalii hu_ii maujo.n me.n
tuufaan kab aa_egaa a.ndaazaa lagaa le.nge

ham dekh nahii.n sakate sharmi.ndagii-e-qaatil
duniyaa kii nigaaho.n se zaKmo.n ko chhupaa le.nge