huii ye ham se naadaanii terii mahafil me.n jaa baiThe
zamiin kii khaaq hokar aasamaan se dil lagaa baiThe

Kabar kyaa thii gulistaan-e-muhabbat me.n bhi khatare.n hai.n
jahaa.N giratii hai bijalii ham usii Daalii pe jaa baiThe

huaa khuun-e-tamannaa isakaa shiqavaa kya kare.n tumase
na kuchh sochaa na kuchh samajhaa jigar par tiir khaa baiThe

na kyo.n a.njaam-e-ulfat dekh kar aa.Nsu nikal aaye
jahaa.N ko luuTane vaale khud apanaa ghar luTaa baiThe