biga.De hue nasiib kaa afasaanaa hii to huu.N
hai chaak garebaa.N meraa diiwaanaa hii to huu.N

ai shammaa mere haal pe rotii hai kis li_e
jal jaanaa meraa kaam hai parawaanaa hii to huu.N

gulashan kahaa.N kaa, gul kaa bhii ab to nahii.n nishaa.N
uja.Dii huii bahaar huu.N viiraanaa hii to huu.N

kyo.nkar mai.n paa_uu.N ma.nzil-e-maqasuud kaa pataa
duniyaa kii rasm-o-raah se begaanaa hii to huu.N