juu.De me.n gajaraa mat baa.Ndho, meraa giit mahak jaaegaa
terii priit sulag jaaegii, meraa pyaar chhalak jaaegaa

jitanii nazar jhukaaogii tum, utanii nazar lagegii tumako
naino.n me.n kajaraa mat Daalo, koii raah bhaTak jaaegaa

jab tum letii ho a.Nga.Daaii, dil kii dha.Dakan ba.Dh jaatii hai
pairo.n me.n ghu.Ngharuu mat baa.Ndho, koii saaz chahak jaaegaa

tere a.ngo.n kii thirakan me.n pyaase giito.n kaa saragam hai
saj-dhaj_kar itanaa mat Dolo, meraa raag bahak jaaegaa