jo tuu nahii.n to nazaaro.n kaa haal kyaa hogaa
baGair chaa.Nd ke taaro.n kaa haal kyaa hogaa

na koii Kat na Kabar hai salaam hai na payaam
hamaare jaan se pyaaro.n kaa haal kyaa hogaa

kisii ke dil kaa safiinaa bha.Nwar me.n Duubegaa
koii bataae kinaaro.n kaa haal kyaa hogaa

tujhii se ziinat-e-gulashan tujhii se ra.ng-e-chaman
tere baGair bahaaro.n kaa haal kyaa hogaa

charaaG jinakaa nahii.n jal sakaa zamaane me.n
na jaane unakii mazaaro.n kaa haal kyaa hogaa