chup chaap akele chhup chhup ke
mai.n giit khushii ke gaataa huu.N
dil ke zakhmo.n ko chiil chiil
mai.n apanaa jii bahalaataa huu.N

naa bhuulaa huu.N na bhuuluu.Ngaa
vo din jo sapane aaj bane
jo aaj ruuTh kar bhuul gaye
kal tak vo saathii the apane
apane begaane banate kyo.n 
jag se ye bhed chhupaataa huu.N
apanaa jii bahalaataa huu.N ...

zakhmii dil kaa ye daavaa hai
badanaam na hogaa pyaar teraa
ek aah na nikalegii muu.Nh se
ab jalane do sa.nsaar meraa
betaab huu.N aag bujhaane ko
to nayanan niir bahaataa huu.N
apanaa jii bahalaataa huu.N ...