jis din se piyaa dil le gaye dukh de gaye
us din se Gha.Dii pal haaye chain nahii.n aaye
GhaTatii nahii.n dil kii duuriyaa.N, majabuuriyaa.N
mera tum bin jii ghabaraaye chain nahii.n aaye

jab chahake.n pa.nchhii shaam ke
rah jaauu.N mai.n dil ko thaam ke
karuu.N bain tumhaare naam ke
aa.Nsuu ab kis kaam ke
luuTaa hai tumhaare pyaar ne, iqaraar ne
baiThii huu.N mai.n aas lagaaye, chain nahii.n aaye
jis din se piyaa dil le gaye dukh de gaye

aaraam nahii.n mere bhaag me.n
main to kho ga_ii Gam ke raag me.n
dil jalate jalate jalagayaa pyaar kii Tha.NDii aag me.n
jab yaad tumhaarii aa ga_ii ta.Dapaa ga_ii
mere dukhiyaa nain bhar aaye chain nahii.n aaye

jis din se piyaa dil le gaye dukh de gaye
us din se Gha.Dii pal haaye chain nahii.n aaye