kyaa Kabar thii terii mahfil se nikalanaa hogaa
dil  na  chaahe  gaa  magar aag pe chalanaa hogaa

shamaa ik raat jalaa kartii hai lekin mujh ko
umr bhar ke liye chup chaap pighalanaa  hogaa

chhiin lii payaar kii ThanDak to zamaane ne kahaa
tujh ko ik aatish-e-gumanaam me.n jalanaa hogaa

band hai.n maut kii raahe.n bhii asiiro.n ke liye
jaane is  qaid  se  ab  kaise   nikalanaa   hogaa

aasamaa.n vaalaa agar meraa  Kudaa hai to  use
apanii duniyaa ke rivaajo.n ko badalanaa hogaa