(aaj is darjaa pilaa do ke na kuchh yaad rahe)-2
beKudii itanii ba.Dhaa do ke na kuchh yaad rahe
aaj is darjaa pilaa do ke na kuchh yaad rahe

dostii kyaa hai, wafaa kyaa hai muhabbat kyaa hai
dil kaa kyaa mol hai ehasaas kii kiimat kyaa hai
hamane sab jaan liyaa hai ke haqiiqat kyaa hai
aaj bas itanii du_aa do ke na kuchh yaad rahe
aaj is darjaa pilaa do ke na kuchh yaad rahe

mufalisii dekhii, amiirii kii adaa dekh chuke
Gam kaa maahaul, masarrat kii Kizaa dekh chuke
kaise phiratii hai zamaane kii hawaa dekh chuke
shammaa yaado.n kii bujhaa do, ke na kuchh yaad rahe
aaj is darjaa pilaa do ke na kuchh yaad rahe

ishq bechain Kyaalo.n ke siwaa ke kuchh bhii nahii.n
husn beruuh ujaalo.n ke siwaa kuchh bhii nahii.n
zi.ndagii cha.nd sawaalo.n ke siwaa kuchh bhii nahii.n
har sawaal aise miTaa do ke na kuchh yaad rahe
aaj is darjaa pilaa do ke na kuchh yaad rahe

miT na paa_egaa jahaa.N se kabhii nafarat kaa riwaaj
ho na paa_egaa kabhii ruuh ke zaKmo.n kaa ilaaj
(saltanat zulm, Kudaa waham musiibat hai samaaj)-2
zahan ko aise sulaa do ke na kuchh yaad rahe
aaj is darjaa pilaa do ke na kuchh yaad rahe
beKudii itanii ba.Dhaa do ke na kuchh yaad rahe
aaj is darjaa pilaa do ke na kuchh yaad rahe