kuchh log ruuTh kar bhii lagate hai.n kitane pyaare
chup rah ke bhii nazar me.n hai.n pyaar ke ishaare
kuchh log ruuTh kar bhii ...

guzarii hai jo bhii ham par unako bataa_e.n kaise
afasaanaa-e-Gam-e-dil unako sunaae.n kaise
ham ne chhupaa liye hai.n palako.n me.n ashk saare
kuchh log ruuTh kar bhii ...

ham unape beruKii kaa ilazaam kyo.n lagaa_e.n
unakii jafaa kaa ai dil ham kyo.n buraa manaa_e.n
jo chaahe.n ab kare.n vo dil par sitam hamaare
kuchh log ruuTh kar bhii ...

is dil me.n kaise kaise tuufaa.n machal rahe hai.n
apanii hii aag me.n ham chup-chaap jal rahe hai.n
hai.n kitane Kuubasurat is aag ke sharaare
kuchh log ruuTh kar bhii ...