aa.Ndhii chalii to naqsh-e-kaf-e-paa nahii.n milaa
dil jisase mil gayaa wo dubaara nahii.n milaa

% naqsh-e-kaf-e-paa = padachihn, paa.Nv ke nishaan, ##footprints##

ham a.njuman me.n sabakii taraf dekhate rahe
apanii tarah se ko_ii akelaa nahii.n milaa

aawaaz ko to kaun samjhataa ki duur duur
Kaamoshiyo.n kaa dard-shanaasaa nahii.n milaa

% dard-shanaasaa = dard se waaqif ko_ii

kachche gha.De ne jiit lii nadii cha.Dhii huii
majabuut kashtiyo.n ko kinaaraa nahii.n milaa