mere Kayaalo.n kii rahaguzar se vo dekhie vo guzar rahe hai.n
merii nigaaho.n ke aasamaa.N se zamiin-e-dil par utar rahe hai.n

ye kaise mumakin hai hamanashiino ki dil ko dil kii Kabar na pahu.nche
unhe.n bhii ham yaad aate ho.nge ki jin ko ham yaad kar rahe hai.n

tumhaare hii dam qadam se thii jin kii maut aur zi.ndagii abaarat
bichha.D ke tum se vo naamuraad ab na jii rahe hai.n na mar rahe hai.n

isii mohabbat kii roz-o-shab ham sunaayaa karate the daastaane.n
isii mohabbat kaa naam lete hue bhii ham aaj Dar rahe hai.n

chale hai.n tho.De hii duur tak bas vo saath mere 'saliim' phir bhii
ye baat mai.n kaise bhuul jaa_uu.N ki ham kabhii hamasafar rahe hai.n